John 10

Sipi I'ima Auga Ega Sipi Fou

1Ke Iesu eifa pugu einaka, “Iifa gome maamiai laifania. Aufalao aga'o sipi e'i fagapu pa'afinai aekoko kai elao keaga i'oi'iai e'uapagai ekoko auga, painao auga papiau eauni'i kai e'i amu eafi'i auga. 2Kai au kapa pa'afiai ekoko auga sipi ega'ina e'ima'ima'i auga. 3Ke ima'ima auga pa'afi epaagalaisa isa ekoko, ke ega sipi isa aina kelogo kefiakoa. Ke isa ega sipi aka'iai ekae eifani'i epapealai'i. 4Ke isa ifo ega sipi ma'oai epapealai'i afegai aisama, isa eufai kai ega sipi auga isa muninai kelao, gome sipi isa aina kelogo magakania. 5Kai sipi au a'ina akelogonia auga muninai afakelao. Iifa gome auga, sipi au a'ina ega'ina eegai akepiaukoko, gome isa aina akelogo magakania,” eoma. 6Iesu i'ina palapole isa maa'iai eifania kai kapa'ina eifania auga oko akelogo.

7Ega puo Iesu eifa pugu einaka, “Iifa gome maamiai laifania. Sipi e'i fagapu pa'afina auga lau. 8Ke au ma'oai lau agouai kemai au'i painao au'i, ke isa auga painao au'i papiau keauni'i kai e'i amu keafi'i au'i koa i'opo'i. Kai sipi isa aina'i akelogonia. 9Lau auga pa'afi. Au kapa i'ina pa'afinai agekoko auga kania ageisagamau. Ke isa ega'ina pa'afinai agekoko agemai, ke agepealai agelao sipi e'i animai afuga felo ipauma aga'o ageisa. 10Kai painao papiauga auga sipi gapainaoni'i, gaaupugu'i, ke gapalifu'i mo puogai emai. Kai lau lamai auga kaisau lau ainau keafia au'i mauni mamaga fekeafia laoma, ke ega'ina maunina isa alo'iai fepogu, fepafakaua laoma puo lamai.

11“Ke lau auga Sipi I'ima felo au. Sipi i'ima felo auga ifo elogoaina ega sipi fau'iai emae. 12Kai au aga'o afa keoge sipi e'ima'i auga, sipi i'ima inagome auga laa'i. Ega puo ago alo amu'ega emai eisa aisama, sipi epua'afuni'i epiaukoko. Ega aisama ago alo amu'ega ega'ina elao sipi eaga'i euoka'i kekani okaoka. 13Ke au ega'ina epiaukoko, gome isa afa keogeisa puogai epinauga kai, sipi ega'ina ala fekeoma auga gefa'i aga'o aeauga.

14Iesu eifa pugu einaka, “Lau auga Sipi I'ima felo au. Gome lau Amau elogoniau koa i'opoga, lau isafa e'u sipi lalogoni'i, ke e'u sipi isafa lau kelogoniau. Ke lau ifou imaau lalogoaina, sipi fau'iai alamae. 16Kai sipi isa'i i'ina fagapuga alogai akeapapa au'i isafa keapae. Lau sipi ega'ina au'i isafa famaiseini'i fagapu i'ina alogai fekeapa, lau e'u sipi fou aga'omo fekemia laoma. Ke ega'ina sipi'i isafa lau ainau akelogo, ke ma'oai aga'omo akemia lau e'u sipi akemia, ke lau iifou mo sipi i'ima au alamia. 17Ega kainai lau Amau alo ko'agai lau aniu eani alogaina. Gome lau ifou imaau lalogoaina alamae. Ke alamae auga afalamae umamo kai, mauni ega'ina faafimue pugu eoma puo alamae. 18Lau e'u mauni kai aga'o afaeafaniau kai, lau ifou lalogoainiau ega koa alakapa. Ke lau ifou imaau fapipeni auga isapuga eeuai ekae, ke faafimue pugu auga isafa isapuga eeuai ekae. Iifa kapulaga i'ina auga lau Amau eegai laafiia,” eoma.

19Iesu ega eifa oma aisama, Iudea papiau'i ifo'i mo epo'iai ke'eai'i. 20Ke papiau ma'o keifa keinaka, “Isa tiapolo alogai eague, ekafo'o alogaina. Kapa puo isa aina falogo?” keoma.

21Kai isa'i keifa keinaka, “Au aga'o alogai tiapolo eague auga ega nini'ani a'o iina koa laa'i. Ke au aga'o alogai tiapolo eagu auga ala koa maakimi'i auga maaga agepakiakaea agekaina?” keoma.

Iudea Papiau'i Iesu Akepako'ania

22Ega'ina afegai ufainagai Iudea papiau'i Deo ega e'a Deo kepalao penia auga miamia kina emai. Ke ega'ina miamia kina auga inipo aupu alogai emia. 23Ega'ina alogai Iesu elao Deo ega e'a alogai afu aka Solomon ega A'ama keoma auga afugai epea. 24Ega aisama Iudea papiau'i kemai Iesu keapa lofe kai kepa'ani penia keinaka, “Oi Mesaia koa aisama, maamaisai moifa gomeisa mo. Gaika koa maamaisai iifa ko'a aloifania?” keoma.

25Ke Iesu einaka, “Lau oi maamiai laifania efua kai oi lau alopako'aniau paisa. Ke lau Amau akagai mirakulo lakapai'i au'i lau fauai kenini'ani. 26Kai oi lau alopako'aniau paisa, gome oi lau e'u sipi epo'iai laa'i. 27Lau e'u sipi ainau kelogo, ke lau isa lalogoni'i, ke isa lau muniuai kepea. 28Lau isa agu pagai maunina lapeni'i, ke isa afakemae laa'i afakemia. Ke kai aga'o isa lau imauai afaeafilai'i. 29Ke lau Amau isa lau epeniiau Auga, kapa ma'oai eka'egaini'i. Ega puo kai aga'o isa lau Amau imagai afaeafilai'i. 30Gome lau ke lau Amau fou aga'omomai.”

31Ega aisama Iudea papiau'i kepo keafii'i isa kegafouga pugu keoma. 32Kai Iesu isa epaini'i einaka, “Lau Amau eegai mirakulo akaiki'a'i ma'o kemai au'i lakapai'i lapakinaimi. Mirakulo ega'ina epo'iai kapa auga puogai kepoai amofouniau ooma?” eoma.

33Kai Iudea papiau'i iifa kepamue keinaka, “Lai ega'ina mirakulo'i puo'iai amafounio alaoma. Kai oi papiau aumauni mainimu kai, ifomu Deo loomaiso auga, Deo eegai loifa apala puo amafounio aoma,” keoma.

34Ega aisama Iesu einaka, “Ufainagai profeta Deo ega iifa pukagai Deo papiau isa'i eifani'i deo eomai'i auga fouga iina kepapua oma, ‘Lau oi deo laomaimi.’ ▼

▼34 Sam 82:6

35Deo isa eifani'i deo eomai'i mo ganinagai, ega iifa isa epenii'i. Ega puo Deo ega iifa ega'ina auga, iifa ko'a ipauma, ke ageka aoniamo. 36Kai lau auga, lau Amau ekinaniau, alo lolofa au epamiaisau, eulaisau i'ina agofa'a lamai. Ega puo kapa puo lau Deo Gauga laoma auga, oi oifa lau Deo eegai laifa apala ooma. 37Ke lau Amau ekapa auga afalakapa koa aisama, oi lau folopako'aniau. 38Kai lau Amau ekapa auga lakapa koa aisama, oi lau afolopako'aniau mo ganinagai, mirakulo lakapa'i au'i fopako'ani'i, ega koa Amau lau alouai eague, ke lau Isa alogai laague auga agologo felo afaefuafua,” eoma.

39Iesu ega eifa oma aisama, Iudea papiau'i isa kegaafia pugu keoma kai, isa papiau epo'iai eapagea puo akeafia.

40Ega'ina afegai Iesu Jordan agapugegai epagai elao Ioane mamagai mo baptismo epipeni auga afugai eagu. 41Ke egae eaguega kai, papiau ma'o isa eega kemai au'i keifa keinaka, “Ioane mirakulo gouga aga'o aekapaisa mo ganinagai, i'ina auga fouga eifania au'i ma'oai ko'a'i moa'ina,” keoma. 42Ke papiau ma'o egae Iesu kepako'ania.